35 ATTU SEGUNDU Sala in domu de Impera Pissenti, adornada comenti e in domu de Pitanu. SCENA PRIMA Impera Pissenti solu No: de certu non mi pentu De custu matrimoniu. Su sposu Di Angiuledda non est meda dinarosu, Nemancu est miserabili partidu, Est mellus teni bonu su maridu, Chi non tot'is ricchesas de su mundu; Anzis si podit narri francu e tundu, Chi non balint is benis de fortuna, Chi cambiant a momentus chei sa luna Candu mancat sa virtudi. Pitanu, in mesu ai custa gioventudi Est unu sprigu veru de bundadi. Est giovunu de bona voluntadi. Chi s'occupat de su traballu onestu, Afabili e modestu, Esemplari e fervorosu cristianu; Po custu speru meda de Pitanu. Sceti sceti sa littera chi tenit Sa domu ddi mantenit. Est bellu de presenzia, Iscidi essi in su spassiu a s'occurrenzia Senza scaresciri su propriu fattu. Su matrimoniu no est unu cuntrattu De compera e de benda po interessu, Comenti ei su comporai unu possessu, Issu est chi unit duus corus, Inserrat duus tesorus, Santitadi de vida e simpatia. Ei speru che Angiuledda, filla mia, Ddi depat essi un'ottima mulleri, (Tanti prus chi ddu sposat a plexeri) Duncas, si matrimoniu in su xelu Fattu hat su Soberanu, Est custu di Angiuledda cun Pitanu. SCENA SEGUNDA Angiuledda e Arega ANGIULEDDA Ita mi narat mamma? Chini tenit poderi prus de Deus?