O chirca custos dubbios lassare. Flora mia, ponzemus pe' in mare. 12. In s'istante sos dubbios ammella, Ca, si no, cantu prestu m'ïdes mortu: Allestrida sa nae est in su portu, Andemus como, Flora mia bella... Propiziu su ëntu e ogn'istella Nos faghen a partire violenzia… Oh gioja! tue has fissu sa partenzia E non cherzo un'istante durittare! Flora mia, ponzemus pe' in mare. 13. Finis acconos intro a su navìu, Sa vel'est tesa e dadu est su segnale.. Adìu, dura patria fatale, Parentes e amigos totu adìu; Como bos lasso e cantu duro ïu, Cun Flora parto a logos differentes; In issa amigos, patria, parentes In Flora ogni contentu app'a lobrare! Flora mia, ponzemus pe' in mare. Sa bellesa de Clori 1. Ite bella chi ses, cantu m'aggradas, Cantu a sos ojos mios ses grasciosa! A mes'abrile non fiorit rosa Colorida che tue e attraente... Tue faghes amante unu serpente Cun sos risittos tuos e miradas! 2. Ite bellesa in gradu soberanu, Che tue no nde 'antat ates'una S'edad'antiga ne i sa novella... Bellos sun sos fiores in beranu, Est bella s'aurora e i sa luna, Ma tue ses ancora pius bella! 3. In sa persone lughes che istella E incantu dezisu in ojos giughes, In sa persone che istella lughes E ispannas sas nues cun su risu, In ojos giughes incantu dezisu Pro lassare ogni coro a pesa-rue... Bellos sun sos fiores in beranu, Est bella s'aurora e i sa luna, Ma ses ancora pius bella tue! 4. Sa Sardigna chirchadela in totue, Ch'est vanu a nd'incontrare tantu digna; Chircadela in totue sa Sardigna, O isparghide vela in altu mare; Est vanu tantu dign'a nd'incontrare, Essende a totucantas superiora... Bellos sun sos fiores in beranu, Est bella s'aurora e i sa luna, Ma tue pius bella ses ancora! 5. Angelica, Didone, Eleonora It'est su ch'an de raru in paragone? Eleonora, Angelica, Didone, E i sa matess'Elena, ispartana, De raru in paragone it'est su ch'ana Pro chi naschidas sian dae res? Bellos sun sos fiores in beranu, Est bella s'aurora e i sa luna, Ma tue pius bella ancora ses! 6. Pro cussu isciau tou aer mi dés Sinzeru adoradore sempre a prou; Pro cussu aer mi dés isciau tou; Mi paghes de disdignu o de amore,