Sa supposta partenzia 1. Corzu! e cale caminu hap'a leare Si cambiat de clima Venus mia? Deo perfattu sou morrer dia, Si passerat sas roccas de s'Atlante; Ma su decoro de sa car'amante M'obbligat da-e tesu a lagrimare! 2. Corzu! e cale mi leo determinu Si partit atterue Venus bella? Prima ch'intenda simile novella Sutta pes si m'abberzat su terrinu; Tantu e tantu su coro intro a sinu, Partind'issa, non diat appuntare! Deo pro Venus bella accumpagnare, Ferrer che dia in s'ultimu Levante... Ma su decoro de sa car'amante M'obbligat da-e tesu a lagrimare! 3. Dia currer su Garganu niadu, Chi toccat sas aeras cun sa fronte; E bider in Sizilia su monte, Ch'est de fumu e fiammas coronadu; Da-e me diat benner visitadu De sa Franza su regnu militare; E non dia sas terras trascurare De s'Ispagna gherrera e de Brabante. Ma su decoro de sa car'amante M'obbligat da-e tesu a lagrimare! 4. Trascurare non dia s'Inghilterra, De Venus pro ischire una notiscia; Dia andare a Polonia, a Galiscia E a sa Prussiana ultima terra; Pro Venus, chi a sos coros ponet gherra, Ell'e ite non dia ardimentare? Totta dia sa Russia girare Cun tottu sa Turchia cunfinante. Ma su decoro de sa car'amante, M'obbligat da-e tesu a lagrimare! 5. In Turchia, in sos regnos circunvinos, Fagher 'nde chirca premurosa; E bider dia sa profana losa Ch'adoran sos superbos Saracinos; Sos eternos de s'India giardinos, Dia cun maraviglia cuntemplare; Viaggios longos de non che torrare, Fagher dia pro dea simizzante! Ma su decoro de sa car'amante, M'obbligat da-e tesu a lagrimare! 6. Ponemiche in su clima piùs frittu De Zembla o de sa barbara Crimea; O ponemiche inue pro Enea Dido bella su coro si hat traffittu; E da'inie in terras de s'Egittu, E che dia in s'America colpare?... Bentos, abbas, tempestas tott'umpare Non mi dian trattenner un'istante! Ma su decoro de sa car'amante, M'obbligat da-e tesu a lagrimare! 7. S’essera de su mundu in cudda banda, Chi lughet s'aurora boreale; O in su largu Libanu, a su cale Nues e lampos faghene ghirlanda; Da-e logos similes a s'Olanda, A Isparta pro Venus dia andare; E unu passu puru dia dare De sa China a s’imperiu zigante. Ma su decoro de sa car'amante, M'obbligat da-e tesu a lagrimare! 8. Giomper dia a s'Armenia prontamente Subra sos montes de nie cobertos; Girare dia tottu sos desertos De sa pinerosa Africa ardente; E dia pro las ïder solamente Sas undas de su Bosforo passare: Non monte, non desertu, non bi hat mare Chi mi fettat ostaculu bastante... Ma su decoro de sa car'amante, M'obbligat da-e tesu a lagrimare! 9. Finis, de s'Oceanu violentu Currer dia sas abbas piùs malas; Bolare dia senza giugher alas Subra sos astros de su firmamentu; Pro dare a Venus bella unu cuntentu In s’inferru che dia penetrare… Nè dian baler a mi raffrenare Muraglias de massissu diamante! Ma su decoro de sa car'amante, M'obbligat da-e tesu a lagrimare! Corzu! e cale caminu hap'a leare?